პანდემია ენერგოეფექტურობის რბოლას ანელებს

ენერგოეფექტურობის მხრივ, წელს, სავარაუდოდ, ათწლეულის განმავლობაში ყველაზე დაბალი პროგრესი იქნება, რაც მსოფლიოსთვის საერთაშორისო კლიმატის მიზნების მიღწევის კუთხით დამატებით გამოწვევებს შეუქმნის, ნათქვამია საერთაშორისო ენერგეტიკული სააგენტოს (IEA) ხუთშაბათს გამოქვეყნებულ ახალ ანგარიშში.
ინვესტიციების შემცირებამ და ეკონომიკურმა კრიზისმა წელს ენერგოეფექტურობის სფეროში პროგრესი მნიშვნელოვნად შეანელა, წინა ორი წლის განმავლობაში დაფიქსირებული გაუმჯობესების ტემპის ნახევარამდე, ნათქვამია IEA-ს „ენერგოეფექტურობის 2020 წლის“ ანგარიშში.
ანგარიშის თანახმად, გლობალური პირველადი ენერგიის ინტენსივობა, რომელიც წარმოადგენს ენერგიის გამოყენების ეფექტურობის მთავარ მაჩვენებელს მსოფლიოს ეკონომიკური აქტივობის მიერ, მოსალოდნელია, რომ 2020 წელს 1 პროცენტზე ნაკლებით გაუმჯობესდება, რაც 2010 წლის შემდეგ ყველაზე დაბალი მაჩვენებელია. IEA-ს ცნობით, ეს მაჩვენებელი გაცილებით დაბალია იმ მაჩვენებელზე, რომელიც საჭიროა კლიმატის ცვლილებასთან წარმატებით გამკლავებისა და ჰაერის დაბინძურების შემცირებისთვის.
სააგენტოს პროგნოზების თანახმად, IEA-ს მდგრადი განვითარების სცენარის მიხედვით, ენერგოეფექტურობა, სავარაუდოდ, მომდევნო 20 წლის განმავლობაში ენერგიასთან დაკავშირებული სათბურის გაზების ემისიების 40 პროცენტზე მეტს შეამცირებს.
პარიზში დაფუძნებული სააგენტო აღნიშნავს, რომ ეკონომიკური კრიზისის ფონზე ენერგოეფექტურობის სფეროში წელს შენელებულ პროგრესს კიდევ უფრო ამძაფრებს ენერგოეფექტურობის მიმართულებით ინვესტიციების შემცირება და ახალი ავტომობილების გაყიდვების შემცირება.
გლობალურად, ენერგოეფექტურობაში ინვესტიციები წელს 9 პროცენტით შემცირდება.
IEA-ს განცხადებით, მომდევნო სამი წელი იქნება კრიტიკული პერიოდი, რომლის განმავლობაშიც მსოფლიოს ექნება შანსი, შეცვალოს ენერგოეფექტურობის გაუმჯობესების შენელების ტენდენცია.
„იმ მთავრობებისთვის, რომლებიც სერიოზულად არიან განწყობილნი ენერგოეფექტურობის გაზრდის მიმართ, ლაკმუსის ტესტი იქნება ის რესურსების რაოდენობა, რომელსაც ისინი ეკონომიკური აღდგენის პაკეტებში გამოყოფენ ამ მიმართულებით, სადაც ეფექტურობის ზომები ხელს შეუწყობს ეკონომიკურ ზრდას და სამუშაო ადგილების შექმნას“, - განაცხადა IEA-ს აღმასრულებელმა დირექტორმა ფატიჰ ბიროლმა.
„ენერგოეფექტურობა მდგრადი აღდგენისკენ სწრაფვის მსურველი მთავრობების ამოცანების სიის სათავეში უნდა იყოს - ეს არის სამუშაო ადგილების შექმნის მექანიზმი, ის ააქტიურებს ეკონომიკურ აქტივობას, ზოგავს მომხმარებლებს ფულს, ახდენს სასიცოცხლოდ მნიშვნელოვანი ინფრასტრუქტურის მოდერნიზებას და ამცირებს ემისიებს. არ არსებობს საბაბი, რომ მასზე გაცილებით მეტი რესურსი არ დაიხარჯოს“, - დასძინა ბიროლმა.